ਜ਼ਿਲਾ ਮੈਜਿਸਟਰੇਟ ਵੱਲੋਂ ਖੰਨਾ ’ਚ ਹੈਵੀ ਵਾਹਨਾਂ ਦੀ ਐਂਟਰੀ ’ਤੇ ਰੋਕ

ਲੁਧਿਆਣਾ, 11 ਫਰਵਰੀ – ਜ਼ਿਲ੍ਹਾ ਮੈਜਿਸਟ੍ਰੇਟ-ਕਮ-ਡਿਪਟੀ ਕਮਿਸ਼ਨਰ ਲੁਧਿਆਣਾ ਹਿਮਾਂਸ਼ੂ ਜੈਨ ਵੱਲੋਂ ਭਾਰਤੀ ਨਾਗਰਿਕ ਸੁਰੱਖਿਆ ਸੰਘਤਾ, 2023 ਦੀ ਧਾਰਾ 163 ਅਧੀਨ ਪ੍ਰਾਪਤ ਹੋਏ ਅਧਿਕਾਰਾਂ ਦੀ ਵਰਤੋਂ ਕਰਦਿਆਂ ਨਗਰ ਕੌਂਸਲ ਖੰਨਾ ਦੀ ਹਦੂਦ (ਅੰਦਰੂਨੀ ਸ਼ਹਿਰ) ਅੰਦਰ ਸਾਰੇ ਹੈਵੀ ਵਾਹਨਾਂ ਦੀ ਸਵੇਰੇ 8 ਵਜੇ ਤੋਂ ਸ਼ਾਮ 8 ਵਜੇ ਤੱਕ ਐਂਟਰੀ ਕਰਨ ’ਤੇ ਪਾਬੰਦੀ ਹੁਕਮ ਜਾਰੀ ਕੀਤੇ ਹਨ।ਇਨ੍ਹਾਂ ਪਾਬੰਦੀਸੁ਼ਦਾ ਹੈਵੀ ਵਾਹਨਾਂ ਵਿੱਚ ਟਰੱਕ, ਡੰਪਰ, ਟਿੱਪਰ, ਟ੍ਰੇਲਰ ਅਤੇ ਨਿਰਧਾਰਿਤ ਭਾਰ ਤੋਂ ਵੱਧ ਸਮਾਨ ਲਿਜਾਣ ਵਾਲੇ ਵਾਹਨ ਸ਼ਾਮਲ ਹਨ।ਜ਼ਿਲ੍ਹਾ ਮੈਜਿਸਟਰੇਟ ਨੇ ਆਪਣੇ ਹੁਕਮਾਂ ਵਿੱਚ ਦੱਸਿਆ ਕਿ ਉਨ੍ਹਾਂ ਦੇ ਧਿਆਨ ਵਿੱਚ ਆਇਆ ਹੈ ਕਿ ਨਗਰ ਕੌਸ਼ਲ ਖੰਨਾ ਦੀ ਹਦੂਦ (ਅੰਦਰੂਨੀ ਸ਼ਹਿਰ) ਅੰਦਰ ਹੈਵੀ ਵਾਹਨਾਂ ਦੀ ਟ੍ਰੈਫ਼ਿਕ ਦੀ ਗੰਭੀਰ ਸਮੱਸਿਆ ਪੈਦਾ ਹੋ ਰਹੀ ਹੈ। ਦੁਰਘਟਨਾਵਾਂ ਦੇ ਵਧੇਰੇ ਖਤਰੇ ਪੈਦਾ ਹੋਣ ਨਾਲ ਆਮ ਜਨਤਾ ਦੀ ਜਾਨ-ਮਾਲ ਨੂੰ ਖਤਰਾ ਬਣਿਆ ਰਹਿੰਦਾ ਹੈ। ਉਨ੍ਹਾਂ ਕਿਹਾ ਕਿ ਟ੍ਰੈਫ਼ਿਕ ਦੇ ਸੁਚਾਰੂ ਪ੍ਰਬੰਧ, ਜਨ ਸੁਰੱਖਿਆ ਯਕੀਨੀ ਬਣਾਉਣ ਅਤੇ ਕਿਸੇ ਵੀ ਅਣਚਾਹੀ ਘਟਨਾ ਤੋਂ ਬਚਾਅ ਕਰਨ ਲਈ ਨਗਰ ਕੌਸ਼ਲ ਖੰਨਾ ਦੀ ਹਦੂਦ (ਅੰਦਰੂਨੀ ਸ਼ਹਿਰ) ਅੰਦਰ ਹੈਵੀ ਵਾਹਨਾਂ ਦੀ ਆਵਾਜਾਈ ‘ਤੇ ਲੋੜੀਂਦੇ ਨਿਯਮ ਅਤੇ ਪਾਬੰਦੀਆਂ ਲਗਾਉਣਾ ਸਮੇਂ ਦੀ ਲੋੜ ਹੈ।ਵਿਸ਼ੇਸ਼ ਹਾਲਾਤਾਂ ਜਾਂ ਮੌਕਿਆਂ ’ਤੇ ਐਮਰਜੈਂਸੀ ਸੇਵਾਵਾਂ (ਪੁਲਿਸ, ਅੱਗ ਬੁਝਾਉ, ਐਂਬੂਲੈਂਸ ਆਦਿ), ਜ਼ਰੂਰੀ ਵਸਤਾਂ ਜਿਵੇਂ ਦੁੱਧ, ਐਲ.ਪੀ.ਜੀ., ਸਬਜ਼ੀ, ਅਨਾਜ ਆਦਿ ਸਮਾਨ ਲਿਜਾਣ ਵਾਲੇ ਵਾਹਨ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਲਿਖਤੀ ਇਜਾਜ਼ਤ ਪ੍ਰਾਪਤ ਵਾਹਨ ਇਸ ਪਾਬੰਦੀ ਤੋਂ ਬਾਹਰ ਹੋਣਗੇ।ਜ਼ਿਲ੍ਹਾ ਮੈਜਿਸਟਰੇਟ ਨੇ ਸਪੱਸ਼ਟ ਕੀਤਾ ਕਿ ਪਾਬੰਦੀਸੁ਼ਦਾ ਹੈਵੀ ਵਾਹਨ ਟਰੱਕ, ਡੰਪਰ, ਟਿੱਪਰ, ਟ੍ਰੇਲਰ ਅਤੇ ਨਿਰਧਾਰਿਤ ਭਾਰ ਤੋਂ ਵੱਧ ਸਮਾਨ ਲਿਜਾਣ ਵਾਲੇ ਵਾਹਨਾਂ ਦੀ ਆਵਾਜਾਈ ਦਾ ਸਮਾਂ ਰਾਤ 08 ਵਜੇ ਤੋਂ ਸਵੇਰ 08 ਵਜੇ ਤੱਕ ਨਿਰਧਾਰਿਤ ਕੀਤਾ ਗਿਆ ਹੈ।ਇਹ ਹੁਕਮ 10 ਫਰਵਰੀ ਤੋਂ 09 ਅਪ੍ਰੈਲ, 2026 ਤੱਕ ਲਾਗੂ ਰਹਿਣਗੇ ਅਤੇ ਇਨ੍ਹਾਂ ਹੁਕਮਾਂ ਨੂੰ ਲਾਗੂ ਕਰਵਾਉਣ ਲਈ ਸੀਨੀਅਰ ਪੁਲਿਸ ਕਪਤਾਨ, ਖੰਨਾ ਜਿੰਮੇਵਾਰ ਹੋਣਗੇ।