ਚਰਚ ਗਏ ਪਰਿਵਾਰ ਦੇ ਘਰੋਂ ਦੋ ਲੱਖ ਰੁਪਏ ਨਗਦੀ ਤੇ ਸੋਨੇ ਚਾਂਦੀ ਦੇ ਗਹਿਣੇ ਚੋਰੀ ਕਰਕੇ ਹੋਏ ਫਰਾਰ

ਇੱਕ ਪਾਸੇ ਜਿੱਥੇ ਲੋਕ ਦੇਰ ਰਾਤ ਤੋਂ ਨਵੇਂ ਸਾਲ 2026 ਤੇ ਜਸ਼ਨਾਂ ਚ ਮਸਰੂਫ ਹਨ ਉੱਥੇ ਹੀ ਦੂਜੇ ਪਾਸੇ ਥਾਣਾ ਭੈਣੀ ਮੀਆਂ ਖਾਂ ਅਧੀਨ ਆਉਂਦੇ ਪਿੰਡ ਦਾਰਾਪੁਰ ਚ ਚੋਰਾਂ ਵੱਲੋਂ ਇੱਕ ਘਰ ਨੂੰ ਉਸ ਵੇਲੇ ਨਿਸ਼ਾਨਾ ਬਣਾਇਆ ਗਿਆ ਜਦੋਂ ਵਿਜੇ ਮਸੀਹ ਪੁੱਤਰ ਪ੍ਰੇਮ ਮਸੀਹ ਦੇ ਪਰਿਵਾਰਕ ਮੈਂਬਰ ਪਿੰਡ ਦੇ ਗਿਰਜਾ ਘਰ ਵਿੱਚ ਚੱਲ ਰਹੇ ਇੱਕ ਧਾਰਮਿਕ ਸਮਾਗਮ ਚ ਹਾਜਰੀ ਭਰਨ ਘਰ ਨੂੰ ਤਾਲਾ ਲਾ ਕੇ ਗਏ ਹੋਏ ਸੀ ।ਜਿਸ ਦੌਰਾਨ ਚੋਰਾਂ ਵੱਲੋਂ ਘਰ ਦੀ ਛੱਤ ਤੋਂ ਪੌੜੀਆਂ ਰਾਹੀਂ ਘਰ ਚ ਦਖਲ ਹੋ ਕੇ ਅੰਦਰਲੇ ਦਰਵਾਜ਼ੇ ਅਤੇ ਗਰਿਲਾਂ ਵਗੈਰਾ ਤੋੜ ਕੇ ਘਰ ਦੀ ਅਲਮਾਰੀ ਚ ਪਈ ਦੋ ਲੱਖ ਦੀ ਨਗਦੀ ਸਮੇਤ ਦੋ ਤੋਲੇ ਸੋਨੇ ਦੇ ਗਹਿਣੇ ਅਤੇ ਕੁਝ ਚਾਂਦੀ ਦੇ ਗਹਿਣੇ ਲੈ ਕੇ ਫਰਾਰ ਹੋ ਗਏ ।ਪੀੜਿਤ ਪਰਿਵਾਰਿਕ ਮੈਂਬਰ ਮਹਿਲਾ ਰਾਜ ਮਸੀਹ ਨੇ ਦੱਸਿਆ ਕਿ ਜਦੋਂ ਉਹ ਧਾਰਮਿਕ ਸਮਾਗਮ ਤੋਂ ਦੇਰ ਰਾਤ 12:30 ਵਜੇ ਦੇ ਕਰੀਬ ਆਪਣੇ ਘਰ ਪਰਤਦੇ ਹਨ ਤਾਂ ਦੇਖਿਆ ਕਿ ਉਹਨਾਂ ਦੇ ਘਰ ਦੇ ਦਰਵਾਜ਼ੇ ਟੁੱਟੇ ਹੋਏ ਸਨ ਅਤੇ ਅਲਮਾਰੀ ਦਾ ਦਰਵਾਜ਼ਾ ਵੀ ਖੁੱਲਾ ਹੋਇਆ ਸੀ। ਉਹਨਾਂ ਦੱਸਿਆ ਕਿ 2 ਲੱਖ ਦੀ ਨਗਦੀ ਅਤੇ ਗਹਿਣਿਆਂ ਸਮੇਤ ਸਾਢੇ ਚਾਰ ਲੱਖ ਦਾ ਉਹਨਾਂ ਦਾ ਨੁਕਸਾਨ ਹੋ ਚੁੱਕਿਆ ਹੈ। ਪੀੜਤ ਔਰਤ ਨੇ ਇਹ ਵੀ ਦਸਿਆ ਕਿ ਓਹ ਵੱਡੀਆਂ ਕਮੇਟੀਆਂ ਪਾਉਣ ਦਾ ਕੰਮ ਕਰਦੀ ਹੈ ਤੇ ਇਹ ਰਕਮ ਵੀ ਕਮੇਟੀਆਂ ਦੀ ਹੀ ਸੀ ਜਦੋਂ ਕਿ ਇਸ ਚੋਰੀ ਦੀ ਵਾਰਦਾਤ ਸਬੰਧੀ ਉਨਾਂ ਵੱਲੋਂ ਖਾਣਾ ਭੈਣੀ ਮੀਆਂ ਖਾਨ ਦੀ ਪੁਲਿਸ ਨੂੰ ਇਤਲਾਹ ਦੇ ਦਿੱਤੀ ਗਈ ਹੈ। ਚਿੰਤਾ ਤੇ ਆਲਮ ਚ ਡੁੱਬੀ ਮਹਿਲਾ ਰਾਜ ਮਸੀਹ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਬੜੇ ਯਕੀਨ ਨਾਲ ਇਹ ਗੱਲ ਕਹੀ ਕਿ ਉਹਨਾਂ ਵੱਲੋਂ ਪੁਲਿਸ ਦੇ ਧਿਆਨ ਚ ਇਹ ਵੀ ਲਿਆ ਦਿੱਤਾ ਗਿਆ ਹੈ ਕਿ ਇਸ ਚੋਰੀ ਦੀ ਵਾਰਦਾਤ ਨੂੰ ਅੰਜਾਮ ਦੇਣ ਵਾਲੇ ਚੋਰ ਕੋਈ ਬਾਹਰੋਂ ਨਹੀਂ ਸਗੋਂ ਉਹਨਾਂ ਦੇ ਪਿੰਡ ਨਾਲ ਹੀ ਸੰਬੰਧਿਤ ਹਨ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਜਿਵੇਂ ਪੀੜਤ ਪਰਿਵਾਰ ਵੱਲੋਂ ਪਿੰਡ ਦੇ ਹੀ ਕੁਝ ਨੌਜਵਾਨਾਂ ਤੇ ਇਸ ਵਾਰਦਾਤ ਦਾ ਸ਼ੱਕ ਜਤਾਇਆ ਗਿਆ ਹੈ। ਕੀ ਥਾਣਾ ਭੈਣੀ ਮੀਆਂ ਖਾਂ ਦੀ ਪੁਲਿਸ ਇਸ ਚੋਰੀ ਦੇ ਮਾਮਲੇ ਦੀ ਗੁੱਥੀ ਸੁਲਝਾਉਣ ਲੱਗਿਆਂ ਕਿੰਨਾ ਸਮਾਂ ਲੈਂਦੀ ਹੈ ।